“Дельта – Онолын физикийн клуб” болон физикийн тэнхим хамтран 2025 оны 2-р сарын 22-нд “Оюутны Физикийн Улсын IV Олимпиад”-ыг амжилттай зохион байгууллаа. Тус олимпиадад мэргэжлийн болон мэргэжлийн бус ангилалд МУИС, ШУТИС, МУБИС, МГТИС-ийн нийт 57 оюутнууд оролцон, өөрсдийн ур чадвар, оюун ухаанаа сорин оролцлоо. Оюутны Физикийн Улсын Олимпиад нь 2019 оноос хойш зогсон, тасраад байсан бөгөөд энэ жил тус олимпиадыг зохион байгуулсан нь их, дээд сургуулийн оюутнуудын дунд физикийн шинжлэх ухааныг эргэн таниулах, суралцах идэвхийг нь нэмэгдүүлэх зорилготойгоор эргэн сэргээсэн билээ.

Олимпиадын мэргэжлийн ангилалд С.Атархүү (МУИС) тэргүүн байр, А.Тэмүүлэн (МУИС) дэд байр, Э.Оргилжаргал (МУИС) гутгаар байр, З.Тэргэл (МУИС), Ц.Жавхлан (МУИС) нар тусгай байрын шагнал хүртжээ. Харин мэргэжлийн бус ангилалд Э.Тэлмүүн (МУИС) тэргүүн байр, Ч.Түвшинтөр (ШУТИС), Б.Тэлмэн (ШУТИС) нар дэд байр, Н.Энхмэнд (ШУТИС), С.Мөнгөнцоож (МУИС), Ч.Байдар (ШУТИС) нар гутгаар байр, Ч.Төгөлдөр (МУИС), И.Азжаргал (ШУТИС), ), Г.Өлзийхүү (ШУТИС), М.Энхтөр (МГТИС) нар тусгай байрын шагнал хүртсэн байна. Олимпиадад шагнал хүртсэн оюутнуудад шагналыг “Нобелийн шагналт физикч Дэвид Ж.Уайнлендийн мэндэлсний 81 жилийн ойн баярт зориулсан өдөрлөг”-ийн үеэр буюу 2-р сарын 24-ний өдөр гардуулан өглөө.

Уг “Нобелийн шагналт физикч Дэвид Ж.Уайнлендийн мэндэлсний 81 жилийн ойн баярт зориулсан өдөрлөг”-ийг мөн “Дельта – Онолын физикийн клуб” болон физикийн тэнхим хамтран зохион байгуулсан бөгөөд өдөрлөгийн үеэр олимпиадад оролцсон болон бусад оюутнуудад урилгаар физикийн тэнхмийн Д.Улам-Оргих багш “Дэвид Ж.Уайнлендийн ажлаас”, физикийн тэнхмийн Б.Төгөлдөр багш  “Квант физикт суралцахуй” сэдвээр, мөн Сөүлийн Их Сургуулийн төгсөгч Д.Оргилболд “1925 оны физик” сэдвээр илтгэл танилцуулав. Уг үйл ажиллагаа нь өдөрлөгт оролцогчдын хувьд ихэд олзуурхууштай байсныг энд онцлох нь зүйтэй.

Үүний дээр Оюутны Физикийн Улсын Олимпиадыг цаашид мөн үргэлжлүүлэн зохион байгуулахыг физикийн тэнхмийн зүгээс мэдэгдсэн билээ.