Тулгар төрийн 2230 жил, Их Монгол Улс байгуулагдсаны 815 жил, Үндэсний эрх чөлөө, тусгаар тогтнолоо сэргээн мандуулсны 110 жил, Ардын хувьсгалын 100 жилийг ойг тохиолдуулан Монгол Улсын Ерөнхийлөгч У.Хүрэлсүх зарлиг гаргаж, эрхэлсэн ажилдаа олон жил үр бүтээлтэй ажиллаж онцгой амжилт гарган, эх орныхоо хөгжил цэцэглэлтэд үнэтэй хувь нэмэр оруулсан МУИС-ийн нэр бүхий багш нарт төрийн дээд цол, одон гардууллаа.

Монгол Улсын Гавьяат багш цолыг МУИС-ийн Физикийн тэнхимийн профессор Гүсээлээгийн Очирбат, Математикийн тэнхимийн профессор Цэндийн Лхамсүрэн, Биологийн тэнхимийн профессор Цагаанбандийн Цэндээхүү нарт тус тус хүртээжээ. Мөн МУИС-ийн Эдийн засгийн тэнхимийн дэд профессор Чулуундоржийн Хашчулууныг алтангадас одонгоор шагнасан байна.

МУИС-ийн захирал Б.Очирхуяг өнөөдөр /2021.12.28/ төрийн дээд цол, одонгоор шагнагдсан багш нарыг хүлээн авч уулзан хүндэтгэл үзүүллээ.

Төрийн дээд цол, одон хүртсэн эрхэм багш нартаа цаашдын эрдэм судлалын ажилд нь өндөр амжилт хүсэн ерөөе.