Профессорын судалгааны семинар боллоо

МУИС-ийн Монгол хэл, хэл шинжлэлийн тэнхимийн “Профессорын судалгааны семинар”-т МУИС-ийн ахмад багш, ШУА-ийн Хэл зохиолын хүрээлэнгийн эрдэм шинжилгээний ажилтан, доктор, дэд профессор М.Баярсайхан уригдан оролцож манж, монгол судлалын чиглэлээр суралцаж буй эрдэмтэн судлаач, оюутан залууст “Монгол манж хэлний үгийн сангийн харилцан нөлөөлөл” сэдэвт судалгааныхаа зарим үр дүнгээс танилцуулав.

Алтай язгуурын хэлнүүдээс монгол, манж хэл өөр хоорондоо бүтэц тогтолцоо, хэлний онцлогоороо их ойр бөгөөд ялангуяа үгийн сангийн хувьд ихээхэн харилцан нөлөөлжээ.

Профессор М.Баярсайхан монгол, манж хэлний дундын үг болон харилцан бие биедээ зээлсэн ормол үгийг судлахдаа хэл бичиг, түүх, угсаатан зүй зэрэг салбар дундын судалгааны  арга зүйгээр судлахын чухлыг онцлон дурдаад, манж хэлнээс монгол хэлэнд орсон 160 орчим үгийг төрөл хэлний сурвалжийн баримтад тулгуурлан тогтоосноо танилцууллаа.