Монгол Улсын Их Сургуулийн Шинжлэх ухааны сургуулийн Хүмүүнлэгийн ухааны салбарын Монгол хэл, хэл шинжлэлийн тэнхим, Өвөр Монголын Их Cургуулийн Монгол судлалын дээд сургууль хамтын ажиллагааныхаа хүрээнд ЕБС-ийн монгол хэл бичиг, уран зохиолын багш нарын туршлага солилцох, мэргэжил дээшлүүлэх “Боловсролын анги-6” хөтөлбөрийг 2024 оны 11 дүгээр сарын 16-29-ний өдөр тус сургуулиудад зохион байгууллаа.

Монгол Улсын Их Сургуулийн Монгол хэл, хэл шинжлэлийн тэнхимийн багш нар эх судлал, өгүүлбэр зүй, бүтээвэр зүй, танихуйн хэл шинжлэл, нийгэм хэл шинжлэл сэдвээр 2024 оны 11 дүгээр сарын 16, 17-ны өдөр хичээл заасан бол Өвөр Монголын Их Сургуулийн Монгол судлалын дээд сургуулийн багш нар мэргэжлийн ур чадвар, монгол хэлний хэл зүй, жангар судлал, нутгийн аялгуу зэрэг сэдвээр 2024 оны 11 дүгээр сарын 20-28-ны өдөр хичээл заав.

Энэхүү хөтөлбөр сургалтад Монгол Улсын 18 аймаг, 8 дүүргийн 43 багш, Монгол Улсын Их Сургуулийн Монгол хэл, хэл шинжлэлийн тэнхимийн “Багш-монгол хэл, уран зохиолын боловсрол”, “Хэл шинжлэл (Монгол хэл)”, “Хэл, уран зохиол” хөтөлбөрийн IV түвшний 7 оюутан хамрагдлаа.