ПРОФЕССОРЫН СУДАЛГААНЫ СЕМИНАР БОЛЛОО

Монгол хэл, хэл шинжлэлийн тэнхимийн профессорын судалгааны семинар болж тус тэнхимийн багш, доктор, профессор Т.Отгонтуул, докторант Э.Жаргалмаа нар “Манж сургаалын зохиолын эх бичгийн судалгаа” сэдвээр илтгэлээ. Тус илтгэлд “Богдын сургаалыг сэнхрүүлэн бадруулсан бичиг” (ma:enduringge tacihiyan-be neileme badarmbuha bidhe) зохиолын эх бичгийн судалгааны тухайд онцлон танилцуулсан бөгөөд тус зохиолын манж, монгол, хятад эх, түүний судалгаа, манж монгол сургаалын зохиолын харьцуулсан судалгааны талаар тус тус танилцууллаа.

Манжийн уран зохиолд сургаалын зохиол чухал байр суурьтай бөгөөд олон ном сурвалж бидэнд уламжлан ирснээс монгол, манж үндэстнүүдийн дунд ялангуяа бичгийн мэргэд өөр хоорондоо ихэд түгээмэл уншиж судалж байсан зохиолуудын нэг нь “Богдын сургаалыг сэнхрүүлэн бадруулсан бичиг” юм.

 Тус семинарт хэл бичгийн ухааны эрдэмтэн судлаач Р.Отгонбаатар, ОУМСХ-ы эрдэм шинжилгээний ажилтан, ӨМИС-ийн докторант Э.Уранбилэг, МУИС-ийн Монгол хэл, хэл шинжлэлийн тэнхим, Антропологийн тэнхимийн оюутан, магистрант, докторант нар оролцож санал бодлоо солилцож, асуулт хариулт өрнүүлэв.