“МОНГОЛ ХЭЛНИЙ ЯРИАНЫ ДУГУЙЛАН” НЭЭГДЛЭЭ

2024 оны 11 сарын 21-нд МУИС-ийн Монгол хэл, хэл шинжлэлийн тэнхимийн дэргэд “Монгол хэлний ярианы дугуйлан” нээлтээ хийлээ. Монгол хэлний ярианы дугуйлан нь Монгол Улсын Их Сургуульд суралцаж буй гадаад оюутнуудад зориулсан мэргэжлийн оюутнуудын сайн дурын үйл ажиллагаа бөгөөд тэдний монголоор ярих ур чадварыг дээшлүүлэх, монгол хэл, соёлын мэдлэгээ тэлэхэд нь туслах зорилгоор тус дугуйланг ажиллуулж эхэллээ. Дугуйланд нэгдсэн монгол оюутнууд ч дэлхийн олон орноос ирсэн гадаад оюутнуудтай танилцаж нөхөрлөх, гадаад хэлний мэдлэг чадвараа хөгжүүлэх боломжтой. Уг дугуйлангийн зөвлөх багшаар Монгол хэл, хэл шинжлэлийн тэнхимийн ахлах багш Ч.Баттулга, доктор Л.Халиун  нар ажиллаж байна.

Нээлтийн үйл ажиллагаанд монгол, япон, солонгос, орос, хятад зэрэг 30 гаруй оюутан оролцсон бөгөөд тэдэнд ахлах багш Ч.Баттулга “Гадаад хүн монгол хэл сурч сургаж ирсэн түүх (XX зууны сүүл үеэс одоо хүртэл)” сэдвээр лекц уншиж, харилцан ярилцав.