ПРОФЕССОРЫН СУДАЛГААНЫ СЕМИНАР БОЛЛОО

Монгол хэл, хэл шинжлэлийн тэнхимийн профессорын судалгааны семинарыг тэнхимийн профессор Т.Отгонтуул удирдаж, докторант Ри Юүнжин “Адуутай холбоотой монгол, солонгос хэлний үг хэллэгийн судалгаа” сэдвээр судалгааны ажлаа танилцуулав.

Семинарт БНСУ-ын Данкүк Их Сургуулийн Монгол хэлний тэнхимийн багш, доктор, профессор Рю Бёнжэ, ШУТИС-ийн багш, доктор Д.Сэрдарам, МУИС-ийн Ази судлалын тэнхимийн багш, докторант Ш.Булгангэрэл, ӨМИС-ийн докторант Алтаншагай болон магистрант, докторант нар оролцож санал бодлоо солилцож, зөвлөгөө өгөв.

Профессор Т.Отгонтуул 20 дугаар зууны манлай хүлэгч, Монгол Улсын Хөдөлмөрийн баатар, гавьяат малчин, тод манлай уяач Д.Даваахүү болон Монгол хэл, хэл шинжлэлийн тэнхимийн багш судлаачдын оролцсон “Монгол адууны нэвтэрхий толь” төслийг удирдаж 2016 онд хоёр боть хамтын бүтээл хэвлүүлсэн билээ. Төслийн үр дүнд монгол адуутай холбоотой судалгаа хийж буй гадаад, дотоодын судлаачдын хамтарсан үйл ажиллагаа өргөжиж Монгол Улсын Их Сургуулийн Монгол судлалын хүрээлэнд Өвөр Монголын Их Сургуультай хамтарсан төсөл хэрэгжиж, Бүгд Найрамдах Солонгос Улсын Хангүг Гадаад хэлний сургуулийн доктор, Юүн Жисү, Бүгд Найрамдах Унгар Улсын Элтэ Их Сургуулийн докторант Корнела Бан нар Монголд хээрийн дадлага хийж, судалгааны хэрэглэгдэхүүн цуглуулжээ.

Дэлхийн олон улс, үндэстэн адууг чухалчлан үздэг боловч адууг эрхэмлэж дээдлэх монголчуудын соёл, ёс заншил, эх сурвалж баялаг, өөрсдийн ялгарах өвөрмөц онцлогоо өнөө хүртэл хадгалж яваа нь судалгааны олон салбарт судлагдахуун болсоор байна.