МУИС-ийн Шинжлэх ухааны сургуулийн Хүмүүнлэгийн ухааны салбарын Монгол хэл, хэл шинжлэлийн тэнхим 2023-2024 оны хичээлийн жилийн “Монгол хэл, соёлын өдөрлөг”-өө “Чингис хааны хүрээ” жуулчны баазад 2024 оны 5-р сарын 11-ний өдөр зохион байгууллаа.

Монгол хэл, үндэсний соёл уламжлалыг сурталчлан таниулах зорилготой тус өдөрлөгт МУИС-ийн Монгол хэл, хэл шинжлэлийн тэнхимийн багш нар, бакалавр, магистр, докторын түвшний суралцагч, төгсөгчид болон монгол хэлний бэлтгэл анги (гадаад оюутнууд)-д суралцаж буй АНУ, БНСУ, Япон Улс, БНХАУ, ОХУ зэрэг 10 гаруй улсын оюутнууд оролцлоо. Монголын Үндэсний Бөхийн Холбоо хамтран ажиллаж, тус холбооны ерөнхий нарийн бичгийн дарга, МУИС-ийн 2014 оны төгсөгч Т.Түмэндэмбэрэл, Улсын засуулууд болон Сэлэнгэ, Архангай, Төв аймгийн сумын заан, залуу бөхчүүд монгол бөхийн соёл, уламжлал, жаяг дэгийг танилцуулав.

Тэнхимийн багш, суралцагчид монгол хэл шүлгийн цоморлог уншиж, монгол бичгийн уран бичлэгийн үзүүлбэр болон морин хуурын аялгуу, уртын дуу, ардын бүжиг, ерөөл магтаал зэрэг язгуур урлагийн тоглолт сонирхуулан, монгол тоглоом наадгайн тэмцээн зохион байгууллаа. Мөн МУИС-ийн Монгол хэл, хэл шинжлэлийн тэнхим төгсөгчийн холбооны тэргүүн, доктор Д.Уртнасан, тус холбооны удирдах зөвлөлийн гишүүн, Монгол Улсын Гавьяат багш, доктор Л.Чулуунбаатар, удирдах зөвлөлийн гишүүн, докторант Н.Оюундарь нар “Төгсөгчийн холбооны цаг”-аар мэргэжлийн үнэ цэн, төгсөгчийн холбооны ажлын төлөвлөгөөний тухай танилцуулсан юм.

Дэлгэрэнгүй мэдээллийг энд дарж үзнэ үү!