Монгол хэлний бэлтгэл хөтөлбөрийг амжилттай дүүргэсэн гадаад оюутнуудад гэрчилгээ гардууллаа
МУИС-ийн Шинжлэх Ухааны Сургуулийн Хүмүүнлэгийн ухааны салбарын Монгол хэл, хэл шинжлэлийн тэнхимийн “Монгол хэлний бэлтгэл” хөтөлбөрийг амжилттай дүүргэсэн гадаад оюутнуудад гэрчилгээ гардуулах ёслол 2024 оны 6 дугаар сарын 04-ний өдөр МУИС-ийн Эрдмийн танхим (Дугуй танхим)-д боллоо.
МУИС нь 1952 оноос хойш гадаад иргэнд монгол хэлний хичээл зааж эхэлсэн ба БНМАУ-ын Сайд нарын зөвлөлийн тогтоол шийдвэрээр гадаадын оюутанд монгол хэлийг заан сургах, сургалтын үйл ажиллагааг дагнан хариуцах Монгол хэлний тэнхимийг 1971 онд байгуулсан байна. МУИС-ийн Монгол хэл, хэл шинжлэлийн тэнхим нь монгол орноо олон улсад сурталчлан таниулах, дэлхийн монгол судлалыг хөгжүүлэх, монгол судлаачдыг бэлтгэх үйл хэрэгт оройлох үүрэг гүйцэтгэсээр ирсэн бөгөөд 30 гаруй орны 6000 орчим гадаадын оюутан тус тэнхимийн “Монгол хэлний бэлтгэл” хөтөлбөрийг дүүргэжээ.
2023-2024 оны хичээлийн жилд Америкийн Нэгдсэн Улс, Бүгд Найрамдах Итали Улс, Бүгд Найрамдах Хятад Ард Улс, Бүгд Найрамдах Солонгос Улс, Бүгд Найрамдах Лаос Улс, Оросын Холбооны улс, Япон улс, Бүгд Найрамдах Турк Улс, Бүгд Найрамдах Кени Улс, Бүгд Найрамдах Унгар Улс, Бүгд Найрамдах Польш Улс, Бүгд Найрамдах Социалист Вьетнам Улс, Бүгд Найрамдах Танзани Улс зэрэг 15 улсын 168 оюутан МУИС-ийн Монгол хэл, хэл шинжлэлийн тэнхимийн “Монгол хэлний бэлтгэл” хөтөлбөрт суралцсанаас хоёр улирал дараалан амжилттай суралцаж, 20 багц цагийн хичээл судалсан 40 оюутан (үүнээс анхан шатны ангийг 22 оюутан, дунд шатны ангийг 6 оюутан, гүнзгий шатны ангийг 12 оюутан) “Монгол хэлний бэлтгэл” хөтөлбөр дүүргэсэн гэрчилгээ гардан авлаа.
Монгол хэлний бэлтгэл хөтөлбөрийг амжилттай төгссөн оюутнуудын гэрчилгээг Монгол хэл, хэл шинжлэлийн тэнхимийн эрхлэгч, доктор Т.Эрдэнэ-Очир, Оюутны хөгжлийн бодлогын газрын дарга В.Дашдаваа, Монгол хэл, хэл шинжлэлийн тэнхимийн багш нарын төлөөлөл гардуулав.
Гэрчилгээ гардаж авсан оюутнуудыг төлөөлж Бүгд Найрамдах Танзани Улсын иргэн Lalika Melkisedeki, Япон улсын иргэн Ichiro Takii, Америкийн Нэгдсэн Улсын иргэн Oyuntseren Jason нар Монгол хэлний бэлтгэл хөтөлбөрт суралцсан сэтгэгдлээсээ хуваалцан, талархал илэрхийллээ.
Амжилттай төгссөн оюутнууддаа баяр хүргэж, эрдэм судлалын их амжилтыг хүсэн ерөөе!
