“ХОС УЯНГА” НЭГДЛИЙН САЛБАР ДУГУЙЛАНГ

БҮРЭНТОГТОХ ЕБС-Д НЭЭЛЭЭ

     МУИС-ийн Монгол хэл, хэл шинжлэлийн тэнхимийн дэргэдэх Монгол бичиг соёлын “Хос уянга” нэгдлийн салбар дугуйланг Монгол үндэсний  баатар Чингүнжавын нэрэмжит, Хөвсгөл аймгийн хошой тэргүүний сургууль Бүрэнтогтох ерөнхий боловсролын сургуульд 2024 оны 5 дугаар сарын 18-ны өдөр нээлээ. Энэхүү дугуйлан нь “Хос уянга” нэгдлийн гурав дахь салбар дугуйлан болж байна.

     Хөвсгөл аймгийн Засаг даргын тамгын газар, Боловсрол, шинжлэх ухааны газар, МУИС-ийн Монгол хэл, хэл шинжлэлийн тэнхим Монгол Улсын Хөдөлмөрийн баатар, Гавьяат багш, доктор, профессор Түмэнбаярын Дашцэдэний мэндэлсний 100 жилийн ойд зориулсан “Эх хэл бидний бахархал-2024” баярыг 5 дугаар сарын 17-18-ны өдөр Мөрөн суманд зохион байгууллаа. Тус баярын хүрээнд “Хос уянга” нэгдлийн 20 жилийн ойд зориулан дэлгэсэн оюутнуудын бүтээл: “Монгол бичиг-Монгол бахархал” үзэсгэлэнгийн бүтээлээр Бүрэнтогтох ЕБС-ийн “Монгол хэл бичгийн кабинент”-ыг тохижуулав. Нээлтийн ёслолд “Бүрэнтогтох ЕБС”-ийн захирал Дэмбэрэлийн Амгалан,  МУИС-ийн Монгол хэл, хэл шинжлэлийн тэнхимийн эрхлэгч, доктор Түмэн-Очирын Эрдэнэ-Очир, Монгол Улсын Гавьяат багш, доктор, профессор Журын Баянсан, МУИС-ийн Монгол хэл, хэл шинжлэлийн тэнхимийн ахлах багш, доктор Ганбатын Баттогтох, МУИС-ийн Монгол хэл, хэл шинжлэлийн тэнхимийн ахлах багш, доктор Мөнх-Эрдэнийн Жавхлан болон багш, сурагч, иргэд оролцлоо. Нээлтийн үеэр доктор Мөнх-Эрдэнийн Жавхлан оролцогчдод уран бичлэгийн соёлыг тайлбарлан танилцуулж, бичих ур чадварын үзүүлбэр сонирхуулан, сургуулиудын хамтын ажиллагаагаа, эх хэл, монгол бичиг, үндэсний өв соёлоо түгээн дэлгэрүүлэх, уламжлан өвлүүлэх боломж, төлөвлөгөөний талаар ярилцлаа.

     МУИС-ийн Монгол хэл, хэл шинжлэлийн тэнхим “Хос уянга” нэгдлийн салбар дугуйланг өмнө нь Нийслэлийн 23-р сургууль, Монгол билиг оюун сургуульд байгуулж байсан юм.