Герман улсын Берлин хот дахь Үндэсний номын сангийн Дорно дахины гар бичмэл, номын цуглуулгад хадгалагдаж буй Монголын түүх, соёлтой холбогдох бичгийн дурсгалуудын талаар сонирхолтой лекцийг Хумболдтын их сургуулийн Ази, Африк судлалын хүрээлэнгийн Монгол судлалын салбарын эрхлэгч доктор А.Ганчимэг Түүхийн хөтөлбөрийн бүх түвшний оюутан, олон нийтэд тавьлаа. Тус номын сангийн цуглуулга нь Европтоо хоёрт орохуйц баялаг цуглуулгад тооцогдох бөгөөд дотроо 220 гаруй газрын зураг, 1500 судар (ялангуяа, алдарт Турфаны гар бичмэл судрууд), Ил хаант улс, Төмөрийн үеийн номын чимэг зураг (Дийзийн альбом), уран болон гэрэл зураг агуулсан арвин баян сан хөмрөг болой.

А.Ганчимэг доктор сан хөмрөгийн агуулгыг тодорхой жишээгээр танилцуулаад зогсохгүй мөн цахим интернет орчинд тэдгээрийг хэрхэн үзэж судалгаа шинжилгээнд хэрэглэж болох арга, холбоосуудыг зааж өгч харуулсан нь хүрэлцэн ирж оролцсон суралцагч, түүх сонирхогчдад нэн үр өгөөжтэй байлаа.

Лекцийг Түүхийн тэнхимийн багш Б.Чинзориг зохион байгуулж удирдав.

smart