МУИС-ийн Түүхийн тэнхимийн харьяа “БАГШ, НИЙГМИЙН УХААНЫ БОЛОВСРОЛ (ТҮҮХ)” (D011413)  бакалаврын сургалтын хөтөлбөр Боловсролын чиглэлийн хөтөлбөрийг магадлан итгэмжлэх комиссын 2024 оны 10 дугаар сарын 24-ний өдрийн 2024/01-41 тоот тогтоолоор 5 жилийн хугацаатай магадлан итгэмжлэгдлээ. Үндэсний хэмжээнд магадлан итгэмжилсэн гэрчилгээг тус тэнхимийн эрхлэгч, Өөрийн үнэлгээний тайлангийн ахлагч Б.Чинзориг, нарийн бичгийн дарга П.Мягмар нар 11 дүгээр сарын 8-ны өдөр хүндэтгэлтэйгээр гардан авав.

Тус хөтөлбөрийн Өөрийн үнэлгээний тайлан боловсруулах, нотлох баримт бүрдүүлэх, шинжээчдийн багтай ажиллах, тайланг зөвлөмж шаардлагад нийцүүлэн сайжруулах, хичээлийн хөтөлбөрийг шинэчлэхэд идэвх зүтгэл гарган ажилласан өөрийн үнэлгээний багийн гишүүд болон хөтөлбөрийг тасралтгүй сайжруулахад хувь нэмрээ оруулсаар ирсэн “Багш, нийгмийн ухааны боловсрол” хөтөлбөрийн багш, оюутан, төгсөгчид, ажил олгогч нартаа талархал илэрхийлье.

Уг сургалтын хөтөлбөрийн чанарыг үндэсний хэмжээнд баталгаажуулсэн явдал нь хөтөлбөрийн төгсөгч, оюутан, багш нарт чухал ач холбогдолтой үйл явдал болж байна. Хөтөлбөр магадлан итгэмжлэгдсэнээр хөтөлбөрийн ирээдүйн элсэгчид Засгийн газрын бодлогын дагуу төрийн дэмжлэг хүртэх боломжтой болж байгаа билээ.

МУИС-ийн Түүхийн тэнхим