МУИС-ийн Түүхийн тэнхим Их эзэн Чингис хааны мэндэлсний 862 жилийн ой, “Монгол бахархлын өдөр”-т зориулсан “Чингис хааны эрин – 2024” хүндэтгэлийн хурлыг 11-р сарын 1-нд зохион байгуулав. Тус хурлын үйл ажиллагааг ШУС-ийн захирал Б.Болд-Эрдэнэ нээж, тус тэнхимийн профессор П.Дэлгэржаргал “Дэлхийг захирах бодлого“, ШУА-ийн Түүх, угсаатны зүйн хүрээлэнгийн Монголын зэнт гүрэн, Дундад үеийн түүхийн салбарын эрхлэгч, доктор Л.Ганбат “Pax Mongolica” сэдэвт үндсэн илтгэлүүдийг тавив.

Мөн Түүхийн тэнхимийн профессор Э.Урангуа, Д.Энхцэцэг нар “Монголчууд: эмэгтэйчүүд (XIII-XIV зуун)“, ШУА-ийн Түүх, угсаатны зүйн хүрээлэнгийн Эртний түүхийн салбарын эрхлэгч, доктор Г.Алтансүх “Чингис хааны үр хүүхдүүд“, Түүхийн тэнхимийн дэд профессор, доктор Б.Батсүрэн “Гүюг, Гүдэн хоёрын тухай нэгэн санал“, МУБИС-ийн Түүхийн тэнхимийн багш, доктор Д.Идэр “Хубилай хаан ба Их Юань хэмээх Монгол улс” сэдвээр тус тус илтгэл хэлэлцүүллээ.

“Монгол бахархлын өдөр”-т зориулсан хурлыг сонирхон хүрэлцэн ирсэн хүмүүс их сургуулийн их танхимыг дүүргэж, хурлын хэлэлцүүлэгт халуун маргаан өрнүүлж байв. Тус хурлын үйл ажиллагааг зохиолч, яруу найрагч Г.Аюурзана хөтөлсөн явдал олон нийтийн анхаарал, сонирхлыг үлэмж татаж, олон нийтэд эх түүхээ мэдэж, бахархах урам зоригийг улам бадраав.