МУИС-ийн Түүхийн тэнхимийн харьяа оюутны “ТИТЭМ ТҮҮХ” клубийн нэрэмжит түүх, нийгмийн ухааны хичээлээр ЭЕШ өгөх гэж буй ахлах ангийн сурагчдад зориулсан “МУИС-тай танилцъя” өдөрлөг амжилттай зохион байгуулагдлаа. Өртөөчилсөн танилцуулга хэлбэрээр явагдсан тус өдөрлөгт нийслэлийн 10-аад сургуулийн 200 гаруй сурагчид оролцсон бөгөөд тэдэнд зориулж чөлөөт ярилцлага лекц зохион байгуулагдав.
Өдөрлөгт нийт долоон өртөө танилцуулга хийгдсэн. Үүнд:
- Нэгдүгээр өртөө – МУИС-ийн тухай мөн, элсэлтийн талаарх танилцуулга.
-
Хоёрдугаар өртөө – МУИС-ийн Түүхийн тэнхимийн танилцуулгын өртөө байсан ба гадаадад суралцах боломж мөн ирээдүйн ажлын байр, тэтгэлэгт хөтөлбөрийн талаар танилцуулга.
-
Гуравдугаар өртөө – 1999 оноос эхлэн үйл ажиллагаа явуулж буй МУИС-ийн ууган клубуудын нэг “Титэм түүх” клубийн танилцуулга, Их сургуульд элссэний дараа клубт элсэхийн давуу талыг харуулсан сурталчилгаа.
-
Дөрөвдүгээр өртөө – МУИС-д элсэхийн өмнөх том даваа болох ЭЕШ-ийг хэрхэн амжилттай өгөх талаар оюутнуудын хувийн туршлага болон зөвлөмж танилцуулга.
-
Тавдугаар өртөө – Сурагчид лекцээ хүлээх зуураа дурсгалын зураг татуулах, шагай хаяж чихэр хожих, сонирхолтой самбар, урмын үгтэй самбар, асуултанд хариулж юм хожих зэрэг “Сонирхолтой булан”.
-
Зургаа, долдугаар өртөө – Сурагчдыг МУИС-ийн төв байр, номын сантай танилцуулах хөтөч өртөө тус тус багтаж байв.
ЕБС-ийн ахлах ангийн сурагчдад зориулсан чөлөөт ярилцлага, лекцүүдэд өндөр оноот оюутан ХЗС-ийн 3-р курсийн оюутан Т.Алтанбагана туршлагаа хуваалцаж, МУИС-ийн Түүхийн тэнхимийн төгсөгч, ШУТИС-ийн багш доктор, дэд профессор Д.Сэрдарам “МУИС-ийг яагаад сонгох чухал” талаар лекц уншиж, мөн нийгмийн ухааны багш М.Мөнхжаргал багш нийгмийн ухааны хичээлээр ЭЕШ өгөхөд хэрэгтэй сонирхолтой аргуудаасаа хуваалцан зөвлөмж өгөв. Лекцэд илтгэл уншиж туршлага, мэдлэгээ харамгүй хуваалцсан лекторууддаа клубийн гишүүдийн өмнөөс талархал илэрхийлье.
Өдөрлөгт хүрэлцэн ирсэн сурагчдад энэ жил элсэх МУИС-ийн 5025 оюутны нэг болоорой гэж хүсэж, та бүхний ЭЕШ-д өндрөөс өндөр амжилт хүсье. Эцэст нь энэхүү өдөрлөгийг амжилттай зохион байгуулсан “Титэм түүх” клубийн нийт гишүүддээ талархаж, сурлага хөдөлмөрийн амжилт хүсэн ерөөе.
2023 оны 11-р сарын 18-нд МУИС Багш оюутны хөгжлийн төв