МУИС-ийн ШУС-ийн ХУС-ын Утга зохиол, урлаг судлалын тэнхимээс утга зохиол, урлагийн судлал шүүмжийг хөгжүүлэх, залуу судлаачдыг дэмжих, уран бүтээлч, судлаачдын хамтын оролцоог нэмэгдүүлэх, урлагийн үнэлэмжийг дээшлүүлэх үндсэн зорилгоор “Утга зохиол, урлагийн шүүмж бичвэрийн улсын уралдаан”-ыг санаачлан 2024 оны дөрөвдүгээр сарын 26-ны өдөр зохион байгуулжээ.

Улсын уралдааныг доктор, профессор Д.Цэнджав, доктор, дэд профессор Г.Батсуурь, доктор, профессор Ж.Долгорсүрэн нар шүүсэн байна. Шүүгчид шүүлтдээ утга зохиол, урлагийн шүүмжийн агуулга, онолын суурь үндэслэл, судалгааны арга зүй зэргийг харгалзан үзэж дүгнэсэн тухайгаа шагнал гардуулах үеэр илтгэсэн билээ.

“Утга зохиол, урлагийн шүүмж бичвэрийн улсын уралдаан”-д 20 гаруй бичвэр ирснээс тэргүүн байрыг Х.Чойдогжамц “Магтаалдаа мансуурсан манай театрууд”, дэд байрыг Б.Мөнх-Эрдэнэ “Г.Аюурзанын фатализм”, гутгаар байрыг М.Амаржаргал “Мэргэшсэн хөөмийчийн мэргэжлийн тоглолтыг шүүн шинжлэхүй…” шүүмжээр тус тус хүртсэн байна.