Ахисан түвшний суралцагчдын эрдэм шинжилгээний хурал болж өндөрлөлөө

Монгол Улсын Их Сургуулийн Философи, шашин судлалын тэнхимээс ахисан түвшний суралцагчдынхаа эрдэм шинжилгээний арга барилыг дээшлүүлэх, бүтээлч сэтгэлгээг нь дэмжих зорилгоор зохион байгуулдаг ээлжит эрдэм шинжилгээний хурал 2026 оны 4 дүгээр сарын 22-ны өдөр Багш, оюутны хөгжлийн төвд амжилттай болж өндөрлөлөө. Хурлыг комиссын дарга, доктор, профессор Б.Дагзмаа нээж, оролцогчдод хурлын дэг, үнэлэх журмыг танилцуулснаар эхлэв.

Тус хуралд нийт хоёр докторант, хоёр магистрант өөрсдийн судалгааны үр дүнгээ танилцуулж, хэлэлцүүлэг өрнүүллээ. Докторант Д.Авирмэд М.Фукогийн бүтээл дэх клиникийн ширтэлт болон шинэ эпистемийн асуудлыг хөндсөн бол, докторант В.Даваасүрэн Нагаржунайн гэгээний шүтэн барилдлагын онолыг хоёр өвөрмөц зохиолын шинжилгээнд тулгуурлан танилцуулав. Мөн магистрант Хианбошиг Хятадын Чан буддизм дахь цагаан хоолны дэглэм ба түүний соёлын онцлогийг тайлбарлаж, магистрант Х.Уянга Монголчуудын далны мэргийн уламжлалт зан үйлийг орчин үеийн нөхцөлд шинжсэн илтгэл хэлэлцүүллээ.

Илтгэл бүрийн дараа комиссын гишүүдийн зүгээс судалгааны арга зүйг нарийвчлах, нэр томьёоны зөрүүг арилгах, харьцуулсан хүснэгт, диаграмм ашиглах зэрэг санал, зөвлөгөө өгөв. Шүүгчдийн үнэлгээгээр тэргүүн байр эзэлсэн докторант Д.Авирмэдийн “Клиникийн ширтэлт: Хүнийг объект болгохуй ба хэлэгдээгүйг унших шинэ эпистем” сэдэвт илтгэлийг Хүмүүнлэгийн ухааны салбарын ахисан түвшний суралцагчийн эрдэм шинжилгээний нэгдсэн хуралд хэлэлцүүлэхээр шийдвэрлэв.

Энэхүү хурал нь ахисан түвшний суралцагчид судалгаагаа шүүн хэлэлцүүлэх, шүүмжлэлт сэтгэлгээ, илтгэх чадвараа сорих чухал талбар болж өнгөрлөө.