“ЧИНГИС ХААНЫ ТАЛ НУТАГТ ДЭЛГЭРСЭН БУРХНЫ ШАШИН СОЁЛ” НОМЫН МОНГОЛ ОРЧУУЛГЫН НЭЭЛТ БОЛОВ

Монгол Улс, Бүгд Найрамдах Энэтхэг Улсын хооронд дипломат харилцаа тогтоосны 70 жилийн ойд зориулсан “Чингис хааны тал нутагт дэлгэрсэн бурхны шашин соёл” номын монгол орчуулгын нээлтийн арга хэмжээ 2026 оны 2 дугаар сарын 13-ны өдрийн 14:00 цагт Монгол Улсын Их Сургуулийн I байрны Эрдмийн танхимд болов.

Энэхүү бүтээл нь Энэтхэгийн нэрт эрдэмтэн, санскритч, буддын судлаач, төр, нийгмийн зүтгэлтэн, профессор Локеш Чандрагийн англи хэлээр бичсэн 568 нүүр хуудас бүхий нэг сэдэвт томоохон зохиол юм. Уг ном Энэтхэг-Азийн утга зохиолын Шата-питака (Sāta-piṭaka) цувралын 640 дүгээр ботид 2013 онд хэвлэгдсэн бөгөөд ийнхүү анх удаа уншигчдын гарт монгол хэлээр хүрч байна.
Номын зохиогч профессор Локеш Чандра нь эцэг профессор Рагу Вира (1902–1963)-гийн үйл хэргийг залгамжлагч юм. Профессор Рагу Вира 1932 онд Лахор хотод “Энэтхэгийн соёлын олон улсын академи”-ийг үүсгэн байгуулж, Шата-питака цувралыг үндэслэн хөгжүүлсэн нэрт эрдэмтэн юм. Тэрбээр дэлхийд тархан хадгалагдаж буй санскрит бичвэрүүдийг олж илрүүлэх, цуглуулах, судлах зорилгоор Төв Ази, Зүүн өмнө Азийн буддын соёлт орнууд, Монгол, Хятад, Оросоор аялж, арвин их судар ном цуглуулсан байдаг.

Ном нь Энэтхэг-Монголын соёлын харилцаа, санскрит-монгол утга зохиолын хэлхээ холбоо, бурхны шашны дэлгэрэлт, монголчуудын буддын утга зохиолыг хөгжүүлсэн түүх, монгол мэргэдийн зохиол бүтээл, сүм хийдийн бар хэвлэл, танка шүтээн зураг, тэдгээрийн үнэ цэн, онцлог шинж, Монгол Ганжуур, Данжуурын эрдэм шинжилгээний ач холбогдол зэрэг өргөн агуулгыг багтаасан бөгөөд нийт 22 бүлэг, ном зүй, хавсралтаас бүрдэнэ.

Орчуулгын ажлыг МУИС-ийн Философи, шашин судлалын тэнхимийн багш нарын бүрэлдэхүүнтэй баг хамтран гүйцэтгэсэн байна. Орчуулгад С.Янжинсүрэн (Ph.D), С.Дэмбэрэл (Ph.D), Л.Өлзийт (Ph.D), О.Бумдарь (Ph.D), Ц.Гаадмаа нар ажилласан бол Д.Бүрнээ (Ph.D), Э.Оюундэлгэр (Ph.D), Д.Юмчинхорлоо (Ph.D) нар хянан тохиолдуулжээ.