Монгол Улсын Их Сургуулийн Монгол хэл, хэл шинжлэлийн тэнхимийн монгол хэлний бэлтгэл хөтөлбөрийн оюутан Япон Улсын иргэн Ямашита Мичика: Монголчууд аргагүй л Чингис хааны үр хойчис болохыг төрийн наадмаас нь харсан

Улаанбаатар, 2026 оны зургаадугаар сарын 16 /МОНЦАМЭ/. Би Япон улсын иргэн Ямашита овогтой Мичика байна.

Монгол хэл сурахаар 2025 оны зургаадугаар сард Монголд анх ирж байлаа. “Чингис хаан” олон улсын нисэх онгоцны буудалд буугаад, Улаанбаатар хот руу явах замдаа Японд байдаггүй үзэсгэлэнт ногоон талыг хараад сэтгэл ихэд хөдөлсөн. Хэзээнээсээ байгальтайгаа зохицон амьдарч сурсан монголчууд “Ямар өвөрмөц зан заншилтай ард түмэн юм бол оо” гэж бодох тусам Монголыг таних сэтгэл минь улам их төрж байсан.

Энд ирээд миний хамгийн анх үзсэн баяр бол улсын наадам. Наадмын нээлтийн үеэр Монголын өнгөрсөн болон өнөөгийн төрхийг харуулсан олон сайхан үзүүлбэр үзсэн. Монголчууд аргагүй л Чингис хааны үр хойчис болохыг морьт жагсаал надад шууд ойлгуулсан.

Мөн морин хуур, ардын бүжиг үнэхээр сайхан сэтгэгдэл төрүүлсэн. Балет, хип хоп дуучдын тоглолтыг үзээд “Энэ улсын урлаг соёл нэн баяжин хөгжиж байна даа” гэж бодогдсон.

Дараагийн өдөр нь соёолон насны морьдын уралдаан үзэв. Барианы газарт морьдын тоос босоход хүмүүс чангаар уухайлж эхэлсэн. 24 км замыг туулж ирсэн учраас унаач хүүхдүүд ч, хүлэг морьд ч цуцсан харагдаж байсан. Гэхдээ л сүүлийн хүчээ шавхан барианы зурхай руу орж ирэх нь сэтгэл догдлуулдаг юм билээ.

Наадамчин олон аз хийморь дуудахаар түрүү морьдын хөлсөнд нь хүрч байсан нь бас л сонирхолтой санагдсан. Манай найз удахгүй Японоос ирнэ. Тэр найзтайгаа наадам үзэхээр төлөвлөж байгаа.

Монгол наадам түүнд гарцаагүй таалагдана гэж бодож байна. Цаашид ч нүүдэлчин түмний өвөрмөц өв уламжлал, түүх соёл, ялангуяа наадмын тухай ойлголтыг олон хүнд таниулж, мэдрүүлэхийг хүсэж байна.

Эх сурвалжийг энд дарж үзнэ үү!