ЭРХЭМ ТӨГСӨГЧ ТАНЫГ ХҮНДЭТГЭН УРЬЖ БАЙНА

БНМАУ-ын Сайд нарын зөвлөл, МАХН-ын төв хорооны 1945 оны 7-р сарын 27-ны өдрийн хамтарсан хурлын 51/44 дүгээр тогтоолоор Маршал Чойбалсангийн нэрэмжит Улсын Их Сургуульд Хэл бичиг, утга зохиолын ангийг 1945 оны 9-р сарын 01-ний өдөр нээж, 33 оюутантай хичээллүүлж эхлэн 1949 онд анхны 19 оюутныг төгсгөж байсан нь өнөөгийн Монгол хэл, хэл шинжлэлийн тэнхимийн үндэс суурь болсон билээ.

Монгол хэл, хэл шинжлэлийн тэнхим нь байгуулагдсан цагаасаа хойш өнөөг хүртэл үндэсний хэмжээнд монгол хэл, бичгийн дээд боловсролтой багш, судлаач мэргэжилтнийг бэлтгэх, монгол хэл бичиг, хэл шинжлэлийн сургалт, судалгааг тогтолцоотойгоор хөгжүүлэх, олон улсын монгол судлаачдыг бэлтгэх, дэлхийн монгол судлалын төвүүдийн монгол судлалын сургалт, судалгааг бэхжүүлэх үйлсэд манлайлан оролцсоор ирсэн юм.

МУИС-ийн Монгол хэл, хэл шинжлэлийн тэнхимийн 80 жилийн түүхийг бүтээлцэж, Монгол эх орондоо төдийгүй олон улсад мэргэжлийнхээ салбарт амжилт гарган ажиллаж, монгол хэл, монгол бичиг соёлоо судлан шинжлэх, заан сургах, түгээн дэлгэрүүлэх, сурталчлан таниулах үйлсэд эрдэм ухаан, билиг оюунаа зориулж, эх орныхоо хөгжил цэцэглэлт, мандал бадралын хөтөч манлайлагч нь байж ирсэн МУИС-ийн Монгол хэл, хэл шинжлэлийн тэнхимийн монгол хэл, уран зохиолын багш; монгол хэл, уран зохиол судлал; эх бичиг судлал, монгол-гадаад хэл (монгол-англи, монгол-хятад, монгол-япон, монгол-солонгос) судлалын ангийг төгссөн үе үеийн төгсөгч нартаа Монгол хэл, хэл шинжлэлийн тэнхим байгуулагдсаны 80 жилийн тэгш ойн баярын мэндийг өргөн дэвшүүлье!

МУИС-ийн Монгол хэл, хэл шинжлэлийн тэнхимийн хамт олон бид тэнхимийнхээ 80 жилийн тэгш ойд зориулан үе шаттай олон үйл ажиллагааг зохион байгуулж байгаа бөгөөд Монгол хэл, хэл шинжлэлийн тэнхимийн үе үеийн төгсөгч Та бүхнийг тэнхимийнхээ ахмад, дунд, залуу үеийн багш нартай уулзах уулзалтад хүрэлцэн ирэхийг урьж байна.

Уулзалт 2025 оны 11 дүгээр сарын 11-12-ны өдрүүдэд МУИС-ийн хичээлийн төв байрны Эрдмийн танхим (Дугуй танхим)-д болно. Төгсөгч, багш нарын уулзалттай холбоотой тодруулах зүйл гарвал тус тэнхимийн эрхлэгч, доктор, дэд профессор Т.Эрдэнэ-Очиртой erdeneochir@num.edu.mn цахим хаягаар болон 99957717 дугаараар холбогдоно уу.

Мөн үе үеийн төгсөгч, ангийн дарга нарыг анги, хамт олныхоо төгсөлтийн зураг, зургийн цомог (монтаж)-ийг нягтрал сайтайгаар сканердаж oyundari.n@num.edu.mn болон mongolian.linguistics1945@gmail.com цахим хаягаар илгээн, Монгол хэл, хэл шинжлэлийн тэнхимийн үе үеийн төгсөгч нарын зургийн цахим цомог бүтээх үйлд туслахыг уриалж байна. Зургийн цомог илгээхтэй холбоотой тодруулах зүйл гарвал тус тэнхимийн багш Н.Оюундарьтай 99929016 дугаараар холбогдоно уу.

МОНГОЛ ХЭЛ, ХЭЛ ШИНЖЛЭЛИЙН ТЭНХИМ