Монгол хэл, хэл шинжлэлийн тэнхимийн дэргэдэх “Хэл шинжлэлийн дугуйлан”-гийн энэ удаагийн зочноор ШУА-ийн Хэл зохиолын хүрээлэнгийн Компьютер хэл шинжлэлийн лабораторийн эрхлэгч, доктор Т.Пүрэвсүрэн “Монгол хэлний цахим хөмрөгийн боловсруулалт” сэдвээр лекц уншиж, өөрийн судалгааны ажлын үр дүнгээс хуваалцлаа.

   Тус лекцэд хэлний үгийн сан, хэл зүйн цахим хөмрөгийг хэрхэн хийдэг, хэрхэн боловсруулж, хөгжүүлдэг, түүнийг хэл шинжлэлийн судалгаанд хэрхэн ашигладаг талаар танилцууллаа. Өөрийн боловсруулсан “Монголын уран зохиолын дээж 108 ботийн цахим сан”-гаас мэдээлэл хайж, ашиглах талаар тодорхой жишээгээр үзүүлсэн нь оюутнуудын сонирхлыг ихээхэн татаж байв. Мөн, судлаачид болон оюутнуудтай хэрхэн хамтарч ажилладаг тухай ярилцаж, “Хэл шинжлэлийн дугуйлан”-гийн оюутнууд өөрсдийн бичиж буй дипломын ажил, илтгэл зэрэгт тус цахим сангаас мэдээлэл хайн ашиглах боломжтойг дурдлаа.

МУИС-ийн Хичээлийн 2-р байр, 304; 2024 оны 11 дүгээр сарын 5-ны өдөр