АРДЫН УРАН ЗОХИОЛЧ, АКАДЕМИЧ Ц.ДАМДИНСҮРЭНГИЙН ГЭР МУЗЕЙТЭЙ ТАНИЛЦЛАА

Монгол хэл, хэл шинжлэлийн тэнхимийн докторантууд болон үйлдвэрлэлийн дадлага хийж буй 4-р түвшний оюутнууд тус тэнхимийн багш доктор, профессор Т.Отгонтуулын удирдлагаар Ардын уран зохиолч, академич Ц.Дамдинсүрэнгийн гэр музейтэй танилцлаа. Тус гэр музейг 1988 оны 8 дугаар сард МАХН-ын Төв хорооны нарийн бичгийн дарга нарын зөвлөгөөн, ШУА-ийн тэргүүлэгчдийн газрын шийдвэрээр эрдэмтэн зохиолчийн амьдран сууж байсан орон сууцанд нь байгуулжээ. Тэрээр 1951 оноос 1986 он хүртэл тус орон сууцанд 35 жил амьдран сууж судалгааны арвин бүтээл хийж хойч үедээ үлдээсэн байна.

Монгол, төвөд, манж, тод үсэг бичгээрх ном судар хадгалагдаж буй тус музейн ном зүйн бүртгэлийг 2018 онд гурван ботиор дахин хэвлэжээ. Монгол, төвөд хэлээрх 5000 шахам ном судар, гар бичмэл эх хадгалагдаж буйгаас гадна дэлхийн олон хэлээрх судалгааны ховор ном, бүтээл ч байдаг.

ШУА-ийн ХЗХ-ийн Утга зохиол судлалын салбарын эрхлэгч, доктор, профессор Г.Билгүүдэй жил бүр тус тэнхимийн оюутнуудад гэр музейн сан хөмрөг, ном бүтээлтэй танилцах боломж олгож, дэлгэрэнгүй тайлбарлаж танилцуулдагт тэнхимийн зүгээс талархал илэрхийлж байна.