МУИС ШУС ХУС-ын Ази судлалын тэнхимийн хятад судлалын салбар болон МУИС-ийн Орчуулагч, Хэлмэрчийн Мэргэшлийн Үнэлгээний Төвтэй хамтран хятад хэлний үеийн галиг тогтоосны 10 жилийн ойд зориулсан “Хятад монгол орчуулгын улсын уралдаан” амжилттай болж өндөрлөлөө.

Тус уралдаан нь 11 сарын 12-28 болон 12 сарын 5 гэсэн хоёр үе шаттай явагдсан бөгөөд Монголын их, дээд сургуулиудын хятад хэл суралцаж буй оюутнуудын орчуулгын чадвар, хэл соёлын мэдлэг болон мэргэжлийн ур чадварыг сорих зорилготой зохион байгуулагдсан юм.

Энэхүү улсын хэмжээний уралдаанд МУИС, ШУТИС, МУБИС, ХУИС зэрэг нэр хүндтэй сургуулиудын 25 оюутан оролцсон нь арга хэмжээний цар хүрээ, өрсөлдөөний түвшнийг нэмэгдүүлсэн бөгөөд шүүгчдийн үнэлгээгээр эхний шатнаас 8 оюутан шалгарч хоёрдугаар шатанд өрсөлдөв.

Хоёрдугаар шатанд оролцогчид хятад хэлнээс монгол хэл рүү орчуулах даалгаврыг өгөгдсөн хугацаанд гүйцэтгэж, орчуулгын зөв бичих зарчим, найруулгын чанар, утгын үнэн зөв дамжуулалт зэрэг шалгуураар дүгнэгдэн,

1-р байранд МУИС-ийн оюутан Л.Солонго,

2-р байранд МУБИС-ийн оюутан Ж.Аякөз,

3-р байранд ХУИС-ийн оюутан Ш.Болдсайхан, Шагналт байранд ШУТИС-ийн оюутан О.Номин, Шагналт байранд МУИС-ийн оюутан Б.Пүрэвсүрэн нар тус тус эзэлж, өргөмжлөл, үнэ бүхий зүйлээр шагнууллаа.

Уралдааныг зохион байгуулагчид энэхүү арга хэмжээ нь оюутнуудын орчуулгын ур чадварыг дээшлүүлэх, хэл соёлын мэдлэгийг нэмэгдүүлэх болон цаашдын сургалт судалгаа, мэргэжлийн хөгжилд нь чухал хувь нэмэр оруулсан үйл явдал болсныг онцлон тэмдэглэлээ.

МУИС, ШУС, ХУС
АЗИ СУДЛАЛЫН ТЭНХИМ